舅父說：「我好掛住呢啲風扇，一條繩拉一拉就開。原來你屋企仲有。」
阿媽答：「好似以前奶婆個閣仔咁，佢一上閣仔，拉一拉繩就全閣仔光晒。我哋嗰時仲點緊火水燈咋，佢已經有電。梗係啦，佢嗰時開舖頭，賣米嘅。」
舅父：「我記得啲人成日讚佢煮野好食，其實係因為佢落得油多。佢嗰時唔肯節衣縮食，偷偷地買油煮餸，所以先咁好食。」
過咗一日，阿媽繼續回味：「我哋細個成日去奶婆度玩，佢間舖好大架，喺大欖，喺我哋小欖隔離，賣米既，拎啲米返嚟磨左佢先賣。」
「另一邊賣酒，有好多酒埕，一個個好大個鑲喺個櫃度。櫃上面有一個個匙羹，寫住一兩二兩，用嚟賣酒。我嗰時一隻腳踩住地下，另一隻腳跨上個櫃度...唔得架，整跌啲羹就聽俾人鬧死。阿舅母好惡架，叫我地唔好喺度玩。」她笑出來，好似仲係當年那個爬酒櫃的丫頭一樣。
「阿婆煮野好好食架，佢對人好囉，成日請人食嘢，所以鬥地主嗰陣，啲人都冇供佢出嚟。」
「我哋叫佢做奶婆，其實即係外婆。佢成日喺閣仔上面伸個頭出嚟望落嚟。」
「有時過節，我哋去食飯，有時食頭圍，有時食尾圍。我地細路仔，邊記得點解有飯食，總之就有啦。好多人食架，又有雞，仲有盞大光燈照住，好威。奶婆好好既，我地就時時食完拎隻脾番去俾阿麻食。」
我問：「咁婆婆細個咪好有錢？」
阿媽答：「係呀，以前婆婆係有錢架，係阿公冇錢啫。不過阿麻就醒呢，佢啲仔女全部都跟有錢人。三姑媽係，二姑媽又係，二姑媽個老公件衫腳掛住舊玉嘅。阿公就娶左婆婆。」
「婆婆三歲就死老豆，奶婆係靠自己一個人做生意，好叻架啦嗰陣時。有時婆婆冇嘢食，都係去奶婆度攞嘢畀我哋食。」
阿媽自動波大談佢同外婆的故事，佢嗰種嚮往同自豪，仲有童真，令我諗起我阿婆。
我哋冇好親密嘅婆孫關係，我冇印象我同佢有點樣接觸，我仲唔係好聽得明佢啲鄉下話，但佢算係非常和藹嘅老人家，尤其是晚年都算成日笑口常開，仲經常戴一頂手塚治虫或畢加索會戴的畫家帽出街。佢成世人都乾乾淨淨，在白加士街住時，屋企養咗隻貓。
我喺佢死後先慢慢知道佢嘅好人好事：我舅父話七八十年代，就算屋企生活困難，婆婆都瘋狂帶電器衣服物資返鄉下畀屋企人、喺我舅父經歷離婚時，雖然佢自己已經好老，離婚並唔係佢年代嘅嘢，但佢仍然好有力咁支持個仔；我阿媽話佢啞忍阿公有外遇；仲有死後大家先發現，佢一早幫自己準備好晒吉儀入晒紙巾，毋須晚輩操心。
我阿媽點樣回想起奶婆，或者就同我點樣回想我阿婆差唔多。我估我阿婆唔會諗到，佢頂帽、佢隻貓或者係佢自己摺定吉儀呢啲喺佢整個人生中唔多重要嘅點滴，會留喺我心裡面。而奶婆都應該唔會估到，佢閣樓嗰盞燈，會成為佢嘅標誌。
