自製Milk Kefir

以前食早餐係牛奶撈加樂氏Special K，有一片片嘅士多啤梨乾，吸埋啲奶後好好食。如果係冬天，仲會先將奶放微波爐叮10秒，等佢唔好咁凍。

喺農場住時，發現早餐可以更加好食。落啲muesli，切個蘋果落去，加提子乾、合桃、三兩羹yogurt，仲可以加啲蜜糖，哇，越來越大碗，但係好好食，日日食都唔覺得厭，而且去廁所亦絕唔成問題。

到後來搬了去Montreal住，布斯韋利士在批發式超市Costco買咗一大個膠筒嘅Kefir返嚟，話Kefir即係類似Yogurt，我一試上癮，佢味道好似Greek styled yogurt咁，比起原味yogurt可能仲酸小小，但係同蜜糖一齊食就啱啱好。

Kefir的好處就好似益力多，大腸蠕動之餘如果對奶類敏感者都可以飲。

返到香港一般超市都唔見有Kefir，於是我上網睇下大家有冇講呢樣嘢。結果發現凡提起Kefir嘅人，大部分都係自己喺屋企整，因為我好覺得好味，而且屋企附近買唔到好食嘅yogurt，Kefir可以代替Yogurt成本仲平啲，咁我就一於都試下。

Milk Kefir是一種讓益生菌喺奶度發酵嘅飲品，只要放益生菌入奶度，放室溫放一晚，第二朝就會成型。













朝早將含有益生菌嘅Kefir Grains用膠濾網過出來(佢哋一舊舊好似飯咁)，餘下的奶水就可以加入早餐度當奶飲。

只要把新的奶加入，益生菌又會繼續做嘢，而且會慢慢越來越大舊，令發酵過程加快。如果飲剩咗或唔趕住飲，可以將Kefir放入雪櫃，可放一兩星期。

益生菌可以即時加入新嘅牛奶度開工，又或者可以放入雪櫃減慢佢哋嘅活力，過幾日再落奶。只要記住過程中勿用金屬即可，NO鐵匙羹NO鐵濾網NO鐵蓋。